鴨脷洲

鴨脷洲（英文：Ap Lei Chau 或者 Aberdeen Island）係香港嘅一個島，屬於南區，喺香港島嘅西南面，香港仔同埋香港仔海峽附近，有1.30 平方公里咁大。

歷史

明朝郭棐嗰本《粵大記》嘅地圖已經有畫鴨脷洲（地圖上面亦有香港村）。鴨脷洲畀船家一個好嘅避風港，喺鴉片戰爭之前有條漁村。1842年，呢個島跟南京條約割咗畀英國，之後就無乜人理。

1968年，香港政府喺鴨脷洲起咗座發電廠，供電畀香港島。1980年，鴨脷洲大橋落成，連埋鴨脷洲同香港島。鴨脷洲就開始高速發展。又起咗公共屋邨嚟安置啲因香港仔避風塘大火而無家可歸嘅漁民。

1989年，發電廠搬咗去南丫島，嗰笪地加埋附近嘅填地，就起咗海怡半島。

地理、人口

鴨脷洲形似鴨脷。最高嘅山係玉桂山（Mount Johnston），山北人多過山南。有四座主要屋苑：利東邨、鴨脷洲大街、鴨脷洲邨同埋海怡半島，每一條邨都有高樓大廈。島南有條工業邨。

鴨脷洲住咗86,782人^[1]，人口密度係每平方公里 66,755 人，係全世界最密質質嘅島^[2]。「鴨脷洲」亦係香港一款岩層嘅名，呢款岩層佔咗香港島南部大部分地方^[3]。

註腳

出面網頁

• 在鴨脷洲長大的日子