魁人政團

魁人政團（法文：Bloc québécois）係加拿大嘅一個聯邦政黨。伊個黨最主要嘅政綱就係推動魁北克（古壁）從加拿大獨立出去，成為一個主權獨立嘅國家。

同其他聯邦政黨唔同嘅係，魁人政團祇會競選魁北克境內嘅75個聯邦議席。從1993年第一次參加大選直到2011年，魁人政團一直囊括到魁北克大多數聯邦議席。但係喺2011年大選裏面，魁人政團遭遇到前所未有嘅慘敗，喺加拿大新民主黨嘅窮追猛打之下，議席由49個跌到剩返4個。

魁人政團最重要嘅盟友係參加魁北克省選嘅魁人黨（法文：Parti québécois）。雖然兩個黨編制唔同，但係經常合作。

政治理念

• 支持魁北克脫離加拿大獨立。
• 喺聯邦政壇上面捍衛魁北克人嘅利益。
• 支持《京都議定書》、同性婚姻以及大麻合法化，反對資助美國國家導彈防禦系統。
• 支持加拿大出兵阿富汗，但係反對延長駐軍期限；反對喺無聯合國授權嘅情況下出兵伊拉克。