非建制派

非建制派（英文：Opposition camp），係香港一個政治派系，同建制派相對。

原本意思

非建制派原本係指以民主普選為政綱嘅派系，而親共傳媒就稱之為反對派。派系包括有以下派別：

• 泛民主派
• 抗爭派
  • 本土派
  • 自決派
• 修憲派

非建制派面對嘅挑戰

內文：針對香港民主派嘅假新聞、 無綫新聞對香港非建制派嘅唔公平對待、 同 針對2020年民主派初選嘅政治檢控拘捕

非建制派一直係佢敵對陣營，包括北京政府、香港政府、建制派同埋佢哋啲支持者嘅攻擊對象，喺立法會亦因為議會制度而差唔多無從發揮。

長久以來，一啲親中派人士亦偶然會用漢奸呢個詞語嚟形容部分泛民主派人士（例如：李柱銘、羅冠聰）。而有啲泛民主派人士就會引述中華蘇維埃共和國等歷史，反駁話中國共產黨先係漢奸。

去到2020年，北京政府夾硬訂立港區國安法，同埋喺2021年通過《全國人民代表大會關於完善香港特別行政區選舉制度的決定（草案）》之後，非建制派就更加冇埞企。喺立法會同區議會，都接連有非建制派被取消議員資格或者因不滿政府對議員嘅決策而辭職，到2021年8月嗰時，成個立法會只係淨返建制派。

而喺議會以外，佢哋亦要面對唔同嘅壓制。因為參與2020年香港立法會選舉民主派初選而被起訴嘅人，更涵蓋（溫和民主派、激進民主派、本土自決派等）成個非建制派嘅政治光譜。

2021年以後

原本嘅非建制派被排除出政制以外之後，喺2021年香港選舉委員會界別分組選舉，有啲媒體將本身被形容為香港中間派嘅新思維狄志遠，形容佢做「非建制派」。不過，BBC嘅中文報導形容佢同泛民主派有一定距離^[1]。自此之後，中間派亦被插入「非建制派」派系以內，「非建制派」一詞嘅意思開始同中國八大民主黨派類近。

睇埋

• 泛民主派
• 中國八大民主黨派

參考

1. ↑ "香港選委會選舉：非建制派參選人誓言發出「另類聲音」". BBC News 中文 (中文). 2021-09-18. 喺2021-09-23搵到.