陳方安生

陳方安生
姓名原文	陳方安生
出生日	1940年1月17號  （82歲）
出生地	上海
本名	方安生
國籍	中華人民共和國
通曉	英文、港澳粵語
母校	香港大學、塔夫斯大學、嘉諾撒聖心書院、聖保祿學校
職業	政治人、公務員
配偶	陳棣榮
家族	方振武家族
阿爸	方心誥
阿媽	方召麐
兄弟姊妹	方曼生、方津生、方順生
[改維基數據]

陳方安生，GBM，JP（Anson Maria Elizabeth Chan Fang On Sang，1940年1月17號—）係前香港特別行政區政務司司長。 上海出世，祖籍安徽省壽縣，原名方安生，因為成日笑到四萬噉口俾人叫佢做陳四萬。

底細、簡歷

陳方安生嘅阿爺係抗日將領方振武，阿爸係中國抗日名將方心誥，阿媽係國畫大師方召麐，阿叔係著名骨科醫生方心讓，細佬方津生都係骨科醫生，阿哥方曼生係律師，堂妹方敏生就係香港社會服務聯會行政總裁。

陳方安生1948年全家去到香港定居。1957年喺嘉諾撒聖心書院畢業，之後入咗香港大學英文同英國文學系，畢業後第二年同陳棣榮結婚，改叫陳方安生。1962年出任政務主任，係香港政府首次出現嘅三位女性政務主任之一；1984年，升為社會福利署署長，成為香港百幾年首位女性署長，但係喺處理1986年嘅郭亞女事件時備受抨擊；1987年係香港經濟司，首位女性華人司級官員；1993年4月任公務員事務司，同年11月29號，任香港公務員嘅最高職位——布政司。1997年2月20號，香港特別行政區首任行政長官董建華宣佈，根據佢嘅提名，中央人民政府批准任命陳方安生為首屆特區政府嘅政務司司長。2001年宣佈辭職，媒體普遍報導係因為同董建華關係唔啱，但係兩個都唔認。

2002年11月7號，陳方安生獲英女王伊利沙伯二世頒授聖米迦勒及聖喬治大十字勳章。

2005年12月4號，佢參加2005年爭取香港普選大遊行，有人認為佢參與遊行嘅原因係為咗競逐第3屆香港行政長官選舉，但係佢喺12月19號否認呢個消息，話參加遊行淨係希望香港快啲實行普選同埋要求行政長官曾蔭權向中央政府爭取普選時間表。

喺香港回歸前，陳方安生同政府裡面一眾女高官俾人統稱叫手袋黨，但係回歸之後，手袋黨嘅影響力已經逐漸消失。

晉身立法會

睇埋：2007年香港立法會港島選區補選同埋2007年香港立法會港島選區補選泛民主派初選

2007年9月11號，陳方安生宣佈以獨立人士身份，競逐民建聯主席馬力病逝後出缺嘅立法會港島區議席。佢表示參選目的係要促進民主，並利用機會為市民爭取普選^[1]。面對有人質疑佢「忽然民主」，陳方安生就話，公務員要學習民主之道，而民主派亦要學習良好管治之道^[2]。

陳方安生宣佈參選後，最先擊敗泛民陣營另一位有意參選嘅勞永樂，再成為泛民陣營協定派出嘅人選。喺進行補選競選期間，陳方安生得到民主黨，公民黨，前綫，社會民主連綫等政黨共30位現任同前任立法會議員支持助選，並得到包括政府文書主任總會、香港政府公務員協會、香港教育專業人員協會、香港文書職系公務員總會、機電工程署一般及共通職系員工會等團體，以及另外490位社會唔同界別專業人士支持佢^[3]。

不過佢喺選舉期間亦受到左派陣營嘅多番攻擊，其中包括指佢喺普選遊行時忽然離隊恤髮，並非真心為普選同民主^[4]。另外，佢亦受到親中派借十成按揭謠言對佢進行攻擊，令佢要多次澄清^[5]。

2007年12月2號，陳方安生以175,874票勝出呢次補選^[6]，擊敗另一主要親中派對手葉劉淑儀，當選港島區立法會議員，並喺同年12月5號宣誓就任^[7]。

退下公民同埋政治工作

2020年6月26號，陳方安生發表聲明，由於已屆80歲，佢遵守對仔女話到時會從公民同埋政治工作退落嚟嘅承諾，過較平靜嘅生活。同時指最近個女離世，對佢係沉痛嘅打擊，需要一啲時間同空間哀悼復原，因此更珍惜同家人嘅相處時刻^[8]。

個人榮譽

勳銜

• 大紫荊勳章（1999年）^[9]
• 非官守太平紳士（2002年）^[10]

榮譽博士

• 香港大學名譽法學博士（1996年）^[11]
• 香港公開大學榮譽文學博士（2000年）^[12]
• 香港中文大學榮譽法學博士（2001年）^[13]

攷

出面網頁

• "香港特別行政區立法會 - 議員資料庫" (中文). 香港特別行政區立法會.