金鐘

搵緊一位編輯嘅話，請睇「金鐘 (編輯)‎」。

金鐘道一景。由金鐘道行人天橋影出去。中為電車，左為政府合署，遠見中銀大廈，右僅僅睇到力寶中心

金鐘（粵拼：gam1 zung1；英文：Admiralty）係香港一地，喺香港島北岸。按四環九約，金鐘查實係中環嘅分區，喺下環側邊，即係同今日灣仔拍埋，舊時以英軍重地，今日主要係寫字樓同商場。

歷史

金鐘雖然係中環一部份，但係佢自英國1841年得到香港開始，就係英軍軍事重地，三軍司令官邸都係響呢區。威靈頓兵房、域多利兵房、美利兵房、同金鐘船塢。金鐘呢個名就來自金鐘船塢呢個海軍船塢，因為裏面有個金色銅鐘而來。而英文名Admiralty就係船塢個英文名Admiralty Dock而來。裏面重有香港海平面高低嘅基準。

因為佢響中環同灣仔市區中間，阻住市區發展，亦唔可以響海邊加新路，所以開埠以來，香港政府一直都想佢搬走，不過礙於英軍反對而無結果。1970年代起，軍事模式同百年來已經好唔同，無必要響市區大量駐軍，所以英軍同意逐漸搬走，畀返啲地香港政府。美利樓搬咗去赤柱做古蹟，而1878年就有嘅海軍船塢就填平，喺對出新填地起咗添馬艦海軍基地同威爾斯親王大廈英軍總部，即係今日駐港解放軍總部。淨低嘅旗杆屋，即係前三軍司令官邸，變成茶具文物館。其他嘅地方最尾唔係變成公園，就係寫字樓，或者政府辦公大樓。

1980年，香港地下鐵路通到金鐘，重有個金鐘地鐵站起響呢度，自始呢區有自己個名，叫金鐘或者Admiralty。

大廈

呢區有多棟大廈，有力寶中心（舊名奔達中心）、統一中心、遠東金融中心、亞太金融中心、美利大廈、海富中心、太古廣場連帶港島香格里拉酒店、港麗酒店同萬豪酒店等。

政府嘅有高等法院、警政大樓、堅偉大樓、金鐘道政府合署等。後來添馬鑑呢塊地起咗香港政府總部。其中警政大樓亦係中環警察總部。

商場有太古廣場、金鐘廊。

另外海皮有中信大廈同香港紅十字會總部。因為自成一角，唔少人當佢響灣仔。

公園

呢區山邊主要有香港公園、夏愨公園同海富公園。香港公園除咗有上面講過嘅旗桿屋，重有紅棉路婚姻註冊處，係香港結婚勝地。

交通

呢區最主要有兩個大道，一條係金鐘道，以前係皇后大道東一部份，有香港電車行過。以往未拉直之前，裏面有一個金鐘道死亡灣角，成日有大單交通意外。另一條係夏愨道，較為近海邊，打通咗灣仔告士打道同中環干諾道中。金鐘廊下面有個好大嘅金鐘巴士總站，而下面金鐘站係荃灣綫、港島綫、南港島綫同東鐵綫嘅四線轉車站，係港島其中一個公共交通輸紐。