荃灣

荃灣
Tsuen Wan
鳥瞰荃灣（2018年6月）
荃灣 荃灣喺香港嘅位置
行政區	香港
地區	新界
區	荃灣區
時區	香港時間（UTC+8）

荃灣係香港新界一個市區地方，係人口密集嘅新市鎮。以前叫淺灣。距離新安縣城南頭九十幾里。有好多城入面嘅名人，包括陳偉業、龍緯汶、林超榮，都住喺荃灣。

歷史

根據香港市政局出版嘅《香港文物》呢本書，荃灣區裏面嘅柴灣角發現過漢代文物。

荃灣原本係海灣，初時叫淺灣，皆因佢灘邊水淺之故。水上人、本地人同客家人都聚居响度，因此近岸處設有墟市。因為近水，又係新界北向南走其中一條要道，有唔少人往來。

淺灣雖然較為偏僻，不過因為有大宋皇帝趙昰走難，所以亦都留名清史。幾本史書都有記低呢事，包括《填海錄》、《厓山集》、《宋史新編〉、《南宋史》。丁丑年九月到趙昰由古瑾走佬來淺灣，十月或者十一月元朝元帥劉深帶舟師到來淺灣。而另有傳說劉深係由城門一路攻入淺灣，而鄉民就起石城打擋元軍，所以叫城門。張世傑打劉深打輸咗，就帶埋趙昰出海去秀山，即係後尾嘅虎門。

清初，大清軍打南明打到落來荃灣，城門谷有南明李萬榮掛住永曆年號，據針山石城抗清。

明末清初，呢度已經叫做荃灣約。後尾有人改寫做全灣約。

荃灣有過另一個名，叫賊灣，家下嘅藍巴勒海峽以前叫三百錢，皆因佢以前有海賊，要收三百錢先可以過海。

地理

荃灣位於大帽山以南，東南面向住藍巴勒海峽，喺青衣島嘅對面岸，後嚟借用咗鄰近地方嘅名嚟命名。喺1950年代，荃灣面積大約有 0.5 平方公里（只係計荃灣市中心入面）。喺嗰陣時，荃灣西部（即係柴灣角到木棉下一帶）嘅海岸線係喺青山公路，而東部（即係木棉下到鹹田一帶）嘅海岸線就係係而家沙咀道。喺填海之前，荃灣有一個海角名，叫做沙咀，而海壩村嘅舊址、鱟地坊、大屋圍、部分嘅福來邨亦都係喺呢個海角之上。

當時，港英政府為咗發展荃灣成為一個新市鎮，就喺1950年代開始就喺荃灣度大規模噉樣填海，第一次填海令到柴灣角消失咗。而荃灣嘅海岸線亦都因為填海移到海盛路同埋楊屋道。喺1980年代，介乎德士古道同埋馬頭壩道嘅海域亦都因為填海工程而填咗做陸地。

喺1990年代，為咗起九廣西鐵（即係而家嘅屯馬綫）嘅荃灣西站，快速公路荃灣路以西嘅海旁再一次填海，喺咁多次填海工程，令到荃灣嘅海岸線拉直，而令到藍巴勒海峽再度收窄，成為咗而家呢個樣。

時至今日，荃灣嘅版圖得以擴張。根據規劃署嘅法定圖則，「荃灣」喺廣義上係由東面嘅和宜合道近梨木樹邨開始，一直西延伸到油柑頭一帶，而汀九以西到青龍頭一帶嘅地方就係屬於荃灣西地區，而兩者同樣都係屬於香港十八區之中嘅荃灣區。

地標

• 如心廣場
• 三棟屋
• 港鐵荃灣站、荃灣西站

出面網頁

• 香港地方 - 地方 - 新市鎮（三）荃灣