潮州

搵緊第二個意思嘅話，請睇「潮州 (搞清楚)」。

潮州（粵拼：ciu4 zau1；潮州話拼音：Tiê-tsiu；英文：Teochew）喺中國廣東東部，喺福建省隔籬，係一個地級市，叫潮州市，轄湘橋區、楓溪區、潮安縣、饒平縣。大清時係個府，叫潮州府，管九縣一廳。潮州係歷史上係粵東嘅政治、經濟、文化中心。

地理

水

潮州位於粵東地區韓江三角洲北部。主要河流有韓江。

史

秦國

公元前214年，秦國南征百粵，屬今日潮州地係南海郡。

大晉

331年，晉朝，今日潮州地係當時東宮郡海陽縣。413年，東宮郡改名做義安郡。

大隋

590年，隋廢郡設州，設循州，之後改名做潮州。隋末唐初，改稱海陽縣改做義安縣。

大唐

大唐時，有州名同郡互換。州名潮州，郡名潮陽郡，而潮陽郡原本叫義安郡。潮州歸嶺南道，下有三縣，海陽縣、潮陽縣同程鄉縣。其中潮陽喺永徽初年取消過，先天初年又復置返^[1]。

大宋

大宋時，潮州又叫潮陽郡，歸廣南東路，元豐年間有戶7萬4682。潮州有三縣，分別係海陽縣、潮陽縣同揭陽縣，是為三陽。不過當中係有變動過，初頭只係得海陽同潮陽，後喺宣和三年，割海陽三鄉做揭陽。紹興三年，廢潮陽、揭陽，拼入海陽。紹興八年，又分返三縣，而揭陽治所搬去吉帛村^[2]。

大清

大清時，潮州係府，叫潮州府，歸惠潮嘉道。領廳一，縣九。即係南澳廳、海陽縣、豐順縣、潮陽縣、揭陽縣、饒平縣、惠來縣、大埔縣、澄海縣同普寧縣。康熙五十七年置黃岡同知。有通判一，治菴埠鎮^[3]。

民國

1914年，中華民國有潮循道。1914年海陽縣改名做潮安縣。

共和國

1953年，拆潮安縣城區起潮州市為省轄市。1955年，粵東行署喺潮州搬嚟汕頭。1958年，潮州市改名做縣級市。1958年11月，撤銷潮州市入潮安縣。1979年，恢復潮州市建制。1983年，撤銷潮安縣入潮州市。1989年1月，潮州市恢復做省轄市。1990年，由廣東省定咗做副地級市。1991年12月，原本係叫做潮州市升咗做地級市，同時擴大區域，管轄新恢復嘅潮安縣、新設立嘅湘橋區、楓溪區同埋原汕頭市管轄嘅饒平縣。

文化

潮州係國家歷史文化名城，有「海濱鄒魯」之稱。潮州文化喺中國嘅地方文化中具有代表性係潮文化得發源地，有專門研究潮州文化嘅「潮學」。潮劇、潮樂、潮繡、潮雕、等等都係潮州文化嘅代表，而潮州工夫茶更加係以考究嘅過程而聞名於世。潮菜亦都係舉世聞名。

旅遊資源

韓文公祠、開元寺、湘子橋、宋明城牆、西湖、鳳凰天池、饒平海濱、濱江長廊、人民廣場、南國冰臼、泰佛殿淡浮文物院等等。潮州八景：湘橋春漲、韓祠橡木、金山古鬆、鳳凰時雨、龍湫寶塔、鱷渡秋風、北閣佛燈、西湖漁筏。

經濟

潮州嘅支柱產業有：陶瓷、不鏽鋼、婚紗禮服、食品同埋電子等等，有「婚紗禮服名城」、「中國瓷都」、「中國不鏽鋼製品之鄉」（潮安縣彩塘鎮）、「中國衛生陶瓷重鎮」（潮安縣古巷鎮）之稱。

交通

• 公路：324國道
• 高速公路：深汕高速公路
• 鐵路：廣梅汕鐵路

僑鄉

潮州係著名嘅僑鄉、旅居世界各地潮人總數超過咗潮州本地。潮人仲有「中國猶太人」之稱、潮州人嘅富商以華人首富李嘉誠做代表聞名天下。世界各地嘅潮人商會多不勝數。

註

出面網站

• TC Faces - Social network to unite Chaozhou all over the globe （英文）