港鐵

「MTR」跳轉到呢度。要睇其他意思，請去【MTR (搞清楚)】。

港鐵（粵拼：gong2 tit3；Mass Transit Railway，簡稱 MTR）普遍係指一張港鐵單程票就可以搭勻晒嘅十條港鐵路綫，係香港嘅城市軌道交通系統，由原本叫做地鐵有限公司嘅香港鐵路有限公司營運。

綜合港鐵系統^[3]（籠統嚟講又可以叫港鐵）係喺2007年12月2號由地鐵同埋九鐵兩個系統合併而成，全屬港鐵公司營運。系統由十條港鐵路綫嘅港鐵系統^[4]、十二條路綫嘅輕鐵系統、連接機場同埋市區嘅機場快綫、提供旅遊纜車系統嘅昂坪360組成，而家有九十五個港鐵站同埋六十八個輕鐵站，總共220.9公里嘅鐵路網絡，貫通港九新界、市區同埋多個新市鎮。2019年，港鐵每日平均嘅載客量大約四百六十萬人次，佔公共運輸總載客量嘅大概41%，係香港公共運輸系統嘅骨幹。^[5]

綫路

前地鐵

• 觀塘綫（黃埔—調景嶺）
• 荃灣綫（荃灣—中環）
• 港島綫（堅尼地城—柴灣）
• 東涌綫（香港—東涌）
• 機場快綫（香港—博覽館）
• 將軍澳綫（北角—寶琳／康城）
• 迪士尼綫（欣澳—迪士尼）
• 昂坪360纜車系統（東涌—昂坪）

前九鐵

• 東鐵綫（金鐘—羅湖／落馬洲），舊稱九廣東鐵
• 西鐵綫（紅磡—屯門），舊稱九廣西鐵（南昌—屯門），2021年同馬鞍山綫合併並改叫屯馬綫（屯門—烏溪沙）
• 馬鞍山綫（大圍—烏溪沙），舊稱馬鞍山鐵路，2020年改叫屯馬綫一期（啟德—烏溪沙），2021年同西鐵綫合併並改叫屯馬綫（屯門—烏溪沙）
• 輕鐵，亦稱西北鐵路，舊稱九廣輕鐵

合併前已停辦鐵路線

• 沙頭角綫（1912年至1928年），由粉嶺站經洪嶺站、禾坑站、石涌凹站，到沙頭角站，主要運送磚同煤^[6]。
• 和合石綫（至1983年），係用嚟運送遺體同埋掃墓嘅人到和合石站^[6]。

合併後新路線

• 南港島綫（金鐘—海怡半島）
• 屯馬綫（屯門—烏溪沙）（屯門—紅磡段原本係西鐵綫，大圍—烏溪沙段原本係馬鞍山綫）

註

1. ↑ 前稱東鐵、西鐵、馬鐵、地鐵；睇港鐵縱橫 - 2008年第3季、統一單程車票系統測試九月二十八號開始乘客提早受惠、統一單程車票系統測試完成 十月二十六日起逐步拆除轉綫閘機、最後一部轉綫閘機拆除 港鐵網絡全面整合
2. ↑ 港鐵嘅英文名（MTR）源自地鐵有限公司（MTR Corporation Limited），意思係「集體運輸鐵路」。
3. ↑ 即係地鐵系統同埋九鐵系統嘅統稱；睇港鐵公司喺2007年度年報嘅釋義。
4. ↑ 港鐵系統由東鐵綫、觀塘綫、荃灣綫、港島綫、東涌綫、將軍澳綫、西鐵綫、馬鞍山綫、迪士尼綫同南港島綫總共十條路綫組合成嘅。出自港鐵公司嘅官方網站嘅港鐵乘客指南及八達通卡車費表第二頁。
5. ↑ "運輸署 - 鐵路". www.td.gov.hk. 喺2021-04-07搵到.
6. ↑ ^{6.0 6.1} "消失的鐵路 原來有條沙頭角支線 - 19+". 2018-04-17. 原著喺2020-03-28歸檔. 喺2018-08-10搵到.

出面啲網

• 港鐵