江門市

江門
江门市
仁壽路、古兜溫泉、新會學宮、長堤騎樓街、景堂圖書館
----
花名：簡稱：江；遞名：四邑、五邑
江門位置圖
經緯度 北緯25°35′52″東經113°5′27″
國	中華人民共和國
省	廣東
地級政區	地級市
市長	劉毅
市委書記	林應武
總面積	9503.9455 km²
人口
總人口(2012)	448.27萬人
人口密度	442人人/km²
時間
時區	中國時區（UTC+8）
----
市花：勒杜鵑
網站： 江門市府

呢篇文講廣東省嘅一個地級市。搵緊四邑嘅一個地方嘅話，請睇「江門」。

江門市（粵拼：gong1 mun4 si5）響中國廣東中西部南岸，西江下游，家下係地級市，叫江門市，舊時係個鎮，叫江門鎮。市管三區四縣級市，即係蓬江區、江海區、新會區，同埋台山市、開平市、鶴山市、恩平市。江門市個城（讀seng）響蓬江，係正牌江門嘅地方，原本係新會縣下嘅墟市。江門市呢帶就係清同民國嘅四邑地方。加埋鶴山，就係五邑。

一般來講，日常講江門，係指舊時江門嘅範圍，即係蓬江區同江海區一帶。

大清曾經同英國簽約，江門做商港，開放畀外國，所以前有名係Kong-Moon。

而家佢係粤港澳大灣區9+2城市群其中一個城市。

名

一般講嘅江門，地處西江同佢支流蓬江嘅匯合處，江南嘅煙墩山，同江北嘅蓬萊山，對峙如門，所以就叫江門。

史

江門響秦、漢係番禺縣地。三國後係新會縣地。

明、清時期，新會縣屬下嘅江門鎮逐漸興起，逐漸成為珠江三角洲嘅一個貿易中心，西江中下游一帶嘅商品多數喺呢度集散。清光緒廿八年（1902年）9月5號，根據《中英續議通商行船條約》開放為通商口岸。

1925年，中華民國將江門定為省轄市。1931年撤銷市建制，畀返新會縣轄。民國時同南海縣佛山鎮，增城縣新塘鎮，東莞縣石龍鎮並稱為廣東四大鎮。當時嘅江門商業極為發達，喺家下市區長堤路、倉後路同埋太平路，附近存有超過三公里嘅騎樓街。當時富商喺市區同埋附近白沙鄉嘅東海里、江右里、迦南里等起咗好多富有西洋風格嘅豪宅。

到咗中華人民共和國，1951年1月12號，又由新會縣劃返出江門市，之後先後由粵中行署、肇慶專區同佛山專區管。政府掟咗一大筆錢，喺江門用來起門類齊全嘅工業體系，出名嘅企業有，曾經係亞洲第二大糖廠嘅江門甘蔗化工廠、江門柴油機廠、江門造紙廠、江門船廠、江門無線電三廠、江門鎖廠、江門電纜廠等等，多不勝數，嗰陣江門嘅產值躍居廣東第三位。

1983年市管縣新體制實行，江門定為省轄地級市，轄下有新會、台山、鶴山、恩平、開平、陽江、陽春共七個縣。1988年，陽江同陽春獨立建市，其餘縣亦相繼升為縣級市。現時一般認為江門指蓬江區同江海區。改革開放後隨住珠三角民營經濟，外向型經濟嘅崛起以及管理不善，江門原先嘅國有工業企業相繼破產或者俾私人收購。人均國民生產總值，逐漸俾鄰市，好似中山同佛山等拋離，成為珠三角相對落後嘅地區。

話

江門一帶，通廣州話。唔少中老年人會講同新會話相似嘅江門話，響後生入面都有好多人平時互相講幾句江門話。但係近年來外地人越來越多，加上好多市區市民嘅仔女都從細講廣州話，唔講江門話，所以而家響江門街頭已經越來越少聽到人講江門話。大部份人重係識聽，不過唔少後生嘅江門人已經係唔識聽台山話、開平話甚至新會話。

除咗江門市區，外海、荷塘、禮樂各地都有自己嘅方言。雖然同江門話、新會話屬同一語系，但係純正嘅外海話依然非常難明。不過而家嘅後生講嘅方言入面已經相當程度廣州話化，傳統特色（但難明）嘅俗語逐漸少見。

經濟

江門曾經係廣東省重要嘅製造業基地，機電、紡織服裝、食品、造船、造紙及紙製品、電子信息、建材等為江門六大支柱產業。但係由於各種原因，江門各工業喺珠三角已經無能力同順德、東莞拗手瓜。現時電單車、輕軌地鐵製造係江門嘅優勢產業。

2018年江門預計地區生產總值2900億，比上年增長7.8%。一般公共預算收入243.93億，增長9.7%。居民人均可支配收入2.9萬，增長8%以上。

人口

江門市區建成區（指堤東，江南，倉後，環市等人口密集區域），人口穩定喺40萬左右，未包括杜阮、潮蓮、荷塘等衛星城鎮。

出面網頁

• 江門市政府首頁