民主建港協進聯盟

「民建聯」跳轉到呢度。要睇同樣簡稱「民建聯」嘅澳門政團，請去【民眾建澳聯盟】。

民主建港協進聯盟
創黨主席	曾鈺成
主席	李慧琼
副主席	陳克勤 張國鈞 陳勇 周浩鼎 陳學鋒
秘書長	王舜義
副秘書長	葉傲冬
創立	1992年7月10號
總部	香港北角英皇道83號聯合出版大廈15樓
黨員人數	43,995（2022年3月）
象徵顏色	藍色
政黨口號	「真誠為香港」
立法會議席	18 / 90 （20%）
區議會議席	22 / 479 （5%）
全國人民代表 大會代表數目	5 / 36 （14%）
中國人民政治 協商會議代表數目	17 / 124 （14%）
政治派系	親中派
意識形態	中國民族主義 社會保守主義 民族保守主義 親中共同香港政府 親商界
政治立場	中間偏右 左翼（歷史上）
網站	dab.org.hk

民主建港協進聯盟（簡稱民建聯，英文：Democratic Alliance for the Betterment and Progress of Hong Kong，英文縮寫DAB），係香港政黨，響1992年7月10號成立，係依家香港最大嘅親中陣營政治組織，亦係香港立法會第一大政黨。

簡史

概述

民建聯原本叫民主建港聯盟，成立時以親北京人士為骨幹。喺56名創黨會員中，有香港工會聯合會幹事（包括陳婉嫻、陳鑑林、譚耀宗）、中學老師同校長（曾鈺成、程介南、葉國謙、馬力、吳康民），而香港特別行政區首任律政司司長梁愛詩亦係佢哋嘅創黨黨員之一。

十年發展

1995年，民建聯第一次派人參選立法局選舉，喺唔少選區都同民主黨直接對壘。喺單議席單票制情況下，成績並唔理想，只贏得2席直選議席同4席功能組別議席。隨後中國政府響1996年設立臨時立法會，重委任民建聯多位成員入臨時立法會，令民建聯響立法機關嘅力量大大增加。由於民建聯嘅親政府作風，畀人泛指為「親政府陣營」、「建制派」、「左派」，亦被泛民主派稱為「保皇黨」。

香港回歸之後，譚耀宗畀行政長官董建華委任加入香港特別行政區行政會議。

1998年，選立法會議員嘅辦法改咗，取消咗彭定康政改方案所設嘅「新九組」，改為其他功能組別；地區直選方面，改用比例代表制，令民建聯長期以嚟整體支持度較低而攞唔到多議席嘅情況改變咗。喺1998年香港立法會選舉入面攞到9席，地方選區五區各取一席。2000年香港立法會選舉入面攞到10席，新界西、九龍東、香港島更攞到兩席，成為香港立法會入面第二大黨，僅次於民主黨。同時喺2000年香港立法會選舉，副主席兼香港島選區名單第一名參選人程介南畀蘋果日報揭發以權謀私，一度使選情逆轉，但最後佢同喺港進聯轉投過嚟嘅蔡素玉雙雙當選，程氏宣佈當選後辭去議席同埋黨職，最後畀廉政公署拉咗，再定罪入獄。

同年年底嘅補選，民建聯候選人鍾樹根以三萬票之差輸畀泛民主派支持嘅余若薇。

2002年，民建聯主席曾鈺成畀行政長官董建華委任加入行政會議。

創黨以來第一次最嚴重慘敗

由於民建聯支持香港基本法第23條立法，黨主席曾鈺成同中委兼立法會議員陳鑑林響七一遊行嗰日話遊行人士畀人誤導嘅印象深入民心，搞到2003年香港區議會選舉入面大敗，響400個直選議席入面淨係攞到62席。當中，以北角嘅錦屏選區蔡素玉火併「長毛」梁國雄、西環觀龍選區葉國謙對戰何秀蘭等最激烈。呢次選舉失利係民建聯創黨以嚟第一次最嚴重嘅慘敗。選舉失利之後，創會主席曾鈺成辭職，改由當時嘅秘書長，港區全國人大代表馬力喺2003年12月接任。

振作前進

響2004年立法會選舉，泛民主派選舉協調失當，加上民建聯成功動員，一共贏咗12席，令民建聯成為有最多立法會議席嘅政黨。

2005年2月，民建聯同另一親政府政黨香港協進聯盟（簡稱港進聯）合併，改名做民主建港協進聯盟，簡稱仍然係民建聯。

2007年1月1號，副主席葉國謙話，民建聯會員人數達8,643人，成為香港各黨派中會員人數最多嘅政黨。

2007年8月8號，主席馬力因為結腸癌併發喺廣州病逝，終年55歲。8月28號，民建聯選出譚耀宗為新任主席。就喺同一年嘅第3屆香港區議會選舉，民建聯派出177人參選，結果115人順利當選。

2008年，民建聯派出45人參選第4屆香港立法會選舉（當中有13人係工聯會代表，包括黃國健名單、王國興名單同埋潘佩璆），結果贏取13席，繼續成為立法會最多議席嘅政黨。

2011年，民建聯派出182人參選第4屆香港區議會選舉，結果136人順利當選（當中包括莫健榮、簡銘東、陸頌雄、姚國威、曾勁聰、黃宏滔、黃潤昌等等同時代表工聯會，而劉江華同時代表公民力量）。

2015年4月17號，民建聯改選領導層，李慧琼當選主席，成為該黨首位女主席，接替譚耀宗。^[1]

創黨以來第二次最嚴重慘敗

2019年11月25號，親中陣營喺第6屆香港區議會選舉遭到大敗（當時香港修例風波重未平息），親中派系政黨議席急挫，民建聯雖然攞到差唔多50萬票，但係民選議席都淨係得21席，可以話係史上新低。事後主席李慧琼請辭，但係得到挽留。

立法會議席喺選制改變後大幅增加

喺第7屆香港立法會選舉入面，民建聯派出22人參選，結果有19人當選，同啟聯資源中心嘅21個立法機關議席嘅紀錄只係相差兩席，繼續成為立法會第一大黨，呈現「一黨獨大」嘅勢頭。

派系

家下係香港第一大政黨，黨員人數超過四萬人，外界一般按民建聯黨員嘅背景而分為以下六大派系：

1. 工聯會，以陳婉嫻、王國興為代表
2. 鄉事派，以張學明、侯金林為代表
3. 福建派，以蔡素玉、洪連杉、盧文端、陳勇為代表
4. 前港進聯成員，以譚惠珠、黃士心為代表，主要為工商界人物
5. 教聯會派系，左派香港教育工作者聯會系統出身嘅成員，包括頭兩任主席曾鈺成同馬力，以及前副主席程介南、葉國謙，甚至乎吳康民、何景安，都係出身自教聯會同左派學校嘅教職員
6. 地方政客，以劉江華、周潔冰為代表

歷任主席

1. 曾鈺成（1992年7月─2003年12月）
2. 馬力（2003年12月─2007年8月8號）
   • （署理）譚耀宗（2007年8月8日─8月28號）
3. 譚耀宗（2007年8月28日─2015年4月17號）
4. 李慧琼（2015年4月17號至今）

黨內架構

中央委員會同埋常務委員會

以粗體標註者另為常務委員會成員

• 主席：李慧琼JP
• 副主席：周浩鼎、陳克勤、張國鈞、彭長緯、陳勇
• 秘書長：陳學鋒
• 副秘書長：葉傲冬

司庫

• 黃建源SBS,MH,JP

常務委員

委員

現任立法會議員

2022-2025年度，民建聯立法會議員一共有18人，議員包括：

選舉成績

立法會

選舉	民選得票	得票率	總議席	領袖
1995	185,547	38.45%	6 / 60	曾鈺成
1998	375,093	25.19%	9 / 60	曾鈺成
2000	393,701	29.60%	11 / 60	曾鈺成
2004	456,608	25.71%	12 / 60	馬力
2008	347,632	22.93%	10 / 60	譚耀宗
2012	366,140	20.35%	13 / 70	譚耀宗
2016	361,617	16.68%	12 / 70	李慧琼

區議會

選舉	總得票	得票率	總議席	領袖
1994	81,126	11.82%	37 / 373	曾鈺成
1999	190,792	23.37%	96 / 519	曾鈺成
2003	246,247	23.09%	67 / 529	曾鈺成
2007	294,687	25.65%	129 / 534	譚耀宗
2011	282,119	23.89%	147 / 507	譚耀宗
2015	309,262	21.08%	119 / 458	李慧琼
2019	492,042	16.85%	21 / 479	李慧琼

爭議

• 有部分民建聯嘅成員，都涉及一啲學歷爭議，例如係葛珮帆、鄭琴淵同柯創盛，被外間（尤其係泛民主派）批評。

注

睇埋

• 香港政治
• 香港協進聯盟（已經同民主建港聯盟合併）

連出去

• 民主建港協進聯盟