李家超

李家超 先生, SBS, PDSM, PMSM, JP
香港特別行政區行政長官
現任
就任日期 2022年7月1號
前任	林鄭月娥
多數票	1416票
香港特別行政區政務司司長
任期 2021年6月25號－2022年4月7號
行政長官	林鄭月娥
前任	張建宗
繼任	空缺
保安局局長
任期 2017年7月1號－2021年6月24號
前任	黎棟國
繼任	鄧炳強
保安局副局長
任期 2012年10月1號－2017年6月30號
局長	黎棟國
前任	黎棟國
繼任	區志光
香港警務處副處長（管理）
任期 2010年3月－2012年9月30號
前任	任達榮
繼任	馬維騄
個人資料
出世	1957年12月7號（64歲）[1]  英屬香港
居住地	香港何文田帝庭園[1]
學歷	公共政策及行政碩士
母校	五邑工商總會學校 九龍華仁書院 查理斯史都華大學
簽名
花名	比卡超[2]、沙塵超[3]

李家超，SBS，PDSM，PMSM，JP（英文：John Lee Ka-chiu，1957年12月7號—），香港親中派政客，現任香港特別行政區行政長官，香港警察出身，做過香港特別行政區政務司司長，兼且做過維護國家安全委員會成員同埋候選人資格審查委員會主席。再之前做過保安局局長、副局長同埋香港警務處副處長。

簡歷

李家超係廣東番禺人。小學時期入讀五邑工商總會學校，中學就讀九龍華仁書院，澳洲查理斯史都華大學公共政策同行政碩士。

1977年加入皇家香港警察，任職見習督察。1997年升任為總警司。

李家超喺警隊服務33年期間，曾經任職多個唔同部門，負責行動工作、刑事調查、警察投訴、服務質素、人事、訓練、資訊科技系統、財務、政策制訂、策劃同發展等。崗位包括西九龍總區指揮官、助理處長（刑事），同埋刑事及保安處處長。佢有豐富刑事調查，危機管理同保安經驗。

佢離開警隊之前，擔任警務處副處長（管理）一職，負責警隊管理制度嘅發展同運作。原定響2014年退休。

2012年10月1號就任保安局副局長，協助保安局局長制訂政策，管理資源。佢亦因而放棄英國國籍。

2017年7月，李家超出任保安局局長^[4]，係史上第一位警察出身嘅保安局局長。任內曾經處理轟動國際嘅反送中運動，佢支持差人嘅立場同言行都係爭議。2020年8月7號，美國財政部宣佈制裁十一位破壞香港自治嘅官員，其中就有李家超。^[5]

2021年6月23號，國務院根據行政長官林鄭月娥嘅提名同建議任命李家超爲政務司司長^[6][7]，25號公佈同生效，同時免去原保安局局長職務，由警務處原處長鄧炳強接任。李家超成爲頭一位差人出身嘅司長，打破以往都係由政務官任職呢個職位嘅傳統。

2021年6月28號至7月1號，​行政長官林鄭月娥去北京參加中國共產黨成立100週年慶祝活動。李家超在任政務司司長三日後，首次署理行政長官職務^[8]。7月6號，佢出任香港特別行政區候選人資格審查委員會主席。

2022年4月6號，中聯辦同選委見面，有選委響會後同媒體講「李家超將會係中央唯一支持嘅候選人」，呼籲其他選委支持佢^[9]。同日下晝三點，佢交咗辭職信^[10]。五點半，佢響記者會上話若果獲批，將會參選2022年香港特別行政區行政長官選舉^[11]。4月8號，佢嘅辭職獲得批準^[12]；同日佢就交表格參選，仲邀請埋譚耀宗出任辦公室主任^[13]。

2022年5月8號，李家超喺第6屆香港行政長官選舉作為唯一候選人以1416票當選。

爭議

妻兒入英藉

2020年5月30號，《東方日報》披露李家超老婆林麗嬋同兩個仔都揸英國籍^[14]。2021年6月25號，李啱啱升官，《明報》向政務司長辦公室查詢佢哋咁嘅情況，有冇違背「愛國者治港」原則，收唔到回應^[15]。

被指婚前性行為

李家超中學時嘅成績唔錯，香港大學工程學系肯收佢，不過李家超唔入讀，轉而走咗去皇家香港警察度打工，佢話噉係由於家庭原因^[16]。2021年6月27號，謎米香港引述自稱係李家超中學同學嘅間接報料，獨家指稱詳情係李家超當年未結婚就同人哋做愛，搞大咗對方個肚，被迫輟學，即刻揾錢來養家^[17]。《明報》喺2022年4月8號重提李家超嘅陳年往事，《信報》亦提及李家超喺1980年結婚，但個仔喺9年後已經讀緊初中，間接證實咗呢個講法嘅客觀事實部份^[18][19]；有啲人（例如：藝人邵子風^[20]）喺李家超當選後亦公開揶揄佢，但李家超個人同香港政府並無承認或否認。

散播香港民主係由主權移交後先開始嘅謠言

睇埋：英國阻礙香港民主自治制度謠言

喺聯合國人權理事會第49屆會議期間，舉辦左個「香港明天更美好」主題視像邊會，李家超以港方代表發言講野，聲稱立左《港區國安法》之後，阻止左好多暴力暴亂嘅出現。佢仲話，香港嘅民主進程係喺中國恢復行使主權之後先開始^[21]，仲話「完善選舉制度」後嘅立法會有競爭，行事效率高。最後，佢仲話香港嘅各類自由無比人減少到。不過，早喺英屬香港年代，香港英國政府同香港政府喺第二次世界大戰後都有喺香港推動民主同人權工作，但呢啲都受到中共干預同埋其他唔同因素，令1997年之前嘅香港最終未達到全面民主化^[22][23][24]。

個人榮譽

• 香港警察榮譽獎章（2000年）^[25]
• 香港警察卓越獎章（2008年）^[26]
• 太平紳士（2012年）^[27]
• 銀紫荊星章（2017年）^[28]

參選2022年香港特首選舉

2022年4月9號，李家超宣布參選特首選舉。喺冇提出政綱嘅情況下，佢就已經得到好多親中派選委嘅支持。而親中派選委呢啲做法就俾一啲人質疑，其中自稱為非建制派嘅立法會議員狄志遠話，有政綱先可以俾人信心，否則唔知憑乜嘢支持，亦唔符合常理。香港民研副行政總裁鍾劍華就話，喺北京政府干預嘅情況下，李家超根本唔會有對手，其他損壞自然心領神會，其他社會議題等事宜都唔重要^[29]。最終李家超當選，但國際社會普遍認為呢次選舉其實係中共欽點，違反民主規範^[30]。

個人競選YouTube頻道界畀人停用

李家超嘅競選辦公室喺短片平台YouTube開設嘅頻道「Johnlee2022」畀人停用，競選辦主任喺2022年4月20號表示，當日朝早接獲Google通知，表示頻道違反美國制裁相關政策^[31]。

攷

出面網頁

• 政務司司長 - 履歷
• GovHK 香港政府一站通：政務司司長 李家超, SBS, PDSM, PMSM, JP （繁體中文）