定義
定義（粵拼：ding6 ji6；英文：definition）係指一段描述某一個詞或者概念嘅意思嘅文字（講定個意義）。以「定義」為例，「定義」呢個詞嘅定義就係前面寫咗嘅「描述某一個詞或者概念嘅意思嘅文字」呢一句嘢。
定義喺學術討論上係一樣好重要嘅嘢，學者做親乜嘢研究通常喺開始討論之前第一樣嘢就係要講明咗用緊嗰啲概念嘅定義先。噉係因為事實表明咗，唔講清楚啲概念嘅定義好易會因為一字多意等嘅問題而出現謬誤[1]。
概論
「白馬到底係唔係馬？」喺答呢條問題之前，討論嘅人應該搞清楚「係」呢個字係咩意思先。
喺哲學同科學嘅討論當中，啲人通常第一樣會做嘅嘢就係講明嗮啲字詞嘅定義先。想像有個一個詞，叫佢做「X」，一個人攞住 X 個定義理應要能夠清楚噉分到「邊啲嘢屬於 X 邊啲嘢唔屬」。噉先至唔會因為搞唔清楚啲字詞嘅定義而引起謬誤[1]。
- 例：白馬非馬
舉個例說明，白馬非馬係一個喺漢字文化圈好出名嘅謬誤，正正就係因為冇搞清楚定義而引起嘅。呢個謬誤簡單啲講係噉嘅：
- 白馬有「白色」呢一樣馬冇嘅特徵，
- 如果話白馬係馬，噉兩樣嘢嘅特徵應該完全一樣嘅，所以
- 白馬唔係馬[2]。
呢一個論證查實係一個謬誤，分析如下：喺包括文言文同粵文在內嘅多種語文入面，「A 係 B」呢句嘢有至少兩個可能意思－佢可以係指
- 「A 同 B 係同一樣嘢」（兩樣嘢嘅特徵完全一樣），又或者係指
- 「A 係 B 嘅一種」；
白馬同馬的確唔係同一樣嘢，但白馬係馬嘅一種，即係話「白馬係馬」呢句嘢喺第一個意思上唔合理，但喺第二個意思上係合理嘅。喺白馬非馬呢個所謂嘅論證當中，論證嗰個人撈亂咗「白馬係馬」呢句嘢嘅兩個可能意思，所以就出咗個謬誤[3]。順帶一提，呢種因為一隻字有幾種意思而引起嘅謬誤就係所謂嘅一字多意（equivocation）。
學術例子
喺廿一世紀初，認真嚴謹嘅學術領域通常一開始都會首先講明自己嘅定義同埋啲基礎概念嘅定義。舉幾個例子說明：
- 物理學：係指用科學方法嚟研究宇宙基本定律嘅領域[4]；
- 化學：係指用科學方法嚟研究物質同物質基本特性嘅領域[5]；
- 生物學：係指用科學方法嚟研究生命嘅領域，不過「『生命』一詞要點定義」喺廿一世紀初嘅生物學上係一條幾有爭議性嘅課題[6]；
- 心理學：係指用科學方法嚟研究人類行為嘅領域[7]；
- 經濟學：係指用科學方法嚟研究貨品同服務嘅生產、消費同埋分配嘅領域[8]；
- 音樂：喺廿一世紀初嘅樂理上，音樂嘅定義係一條有咁上下爭議性嘅課題，不過主流都同意音樂係一種有組織性嘅聲（但唔係全部有組織性嘅聲都係音樂）[9]；
- 畫畫：狹義上係指有意噉用架生將有顏色嘅物料（顏料）鋪上去一個固體嘅表面嗰度，創造出一幅圖像[10][11]。
... 等等。
睇埋
參攷
- ↑ 1.0 1.1 1.2 Bickenbach, Jerome E., and Jacqueline M. Davies. Good reasons for better arguments: An introduction to the skills and values of critical thinking. Broadview Press, (1996). p. 49.
- ↑ 《戰國策》〈趙策〉：「夫刑名之家，皆曰：白馬非馬也。」
- ↑ Damer, T. Edward (21 February 2008). Attacking Faulty Reasoning: A Practical Guide to Fallacy-Free Arguments. Cengage Learning. pp. 121-123.
- ↑ Cropper, W. H. (2004). Great Physicists: The Life and Times of Leading Physicists from Galileo to Hawking. Oxford University Press. ISBN 978-0-19-983208-8.
- ↑ Reinhardt, C. (2001). Chemical Sciences in the 20th Century: Bridging Boundaries, Pages 1–2. Wiley-VCH.
- ↑ Trifonov, Edward N. (2012). "Definition of Life: Navigation through Uncertainties". Journal of Biomolecular Structure & Dynamics. Adenine Press. 29 (4): 647–50.
- ↑ Fernald L.D. (2008). Psychology: Six perspectives (pp.12–15). Thousand Oaks, CA: Sage Publications.
- ↑ Krugman, Paul; Wells, Robin (2012). Economics (3rd ed.). Worth Publishers. p. 2.
- ↑ Gracyk, T. & A. Kania (eds.), 2011, The Routledge Companion to Philosophy and Music, New York: Routledge. pp. 1-13. "Definition".
- ↑ "Paint – Definition". Merriam-webster.com. 2012.
- ↑ Chieffo, Clifford T.: Contemporary Oil Painter's Handbook, Prentice Hall, 1976.
拎
- Definitions, Stanford Encyclopedia of Philosophy, Gupta, Anil (2008)
