南海區

南海（粵拼：naam4 hoi2）喺中國廣東，家下係佛山市一個市轄區，叫南海區。秦時經已有南海郡，範圍好大，有幾個縣。而近幾百年，南海係個縣，叫南海縣。縣境比家下區境大好多，當時同埋番禺同順德合稱南番順，或者三邑，包圍住廣東省城，係全省最庶嘅地方。　

南海個名，源自秦國南海郡，響秦國南便海疆，對住南中國海（又叫南海）。家下南海區係內陸地方，但響當時都係近海。

地理

政治

南海區響廣州市西面，中間包住佛山市中心禪城區。

山

南海區北便有靈洲山，南便有西樵山。大清時舊縣重包括埋越秀山，不過經已劃畀廣州市越秀區。^[1]

水

北江由三水流入南海，再分兩支。東便一支流入紫洞水，去到廣州市番禺入珠江再入順德。西便一支過九江，入順德。^[1]

北便有馬逕水，接埋蘆包水，同三江水會合。之後屈返東北，又接埋黃洞水，廣州又有水注入條河。向南再過石門山就係石門水。過廣州市區，屈向東就入珠江，到番禺。^[1]

史

秦開始有南海郡，而家下南海市，係郡下番禺縣地^[2]。

秦國

秦始皇帝贏政派任囂、趙佗攻嶺南，置咗南海郡。任囂做南海尉，全權管理呢度。而趙佗就做龍川縣令。秦末任囂病危，趁中原大亂，傳尉職畀趙佗。

大漢

大漢元鼎六年，皇帝劉徹派兵消滅咗南越國，設南海郡，屬交州。戶有萬九千六百一十三，口九萬四千二百五十三。有縣六個，即係番禺、博羅、中宿、龍川、四會、揭陽^[3]。去到漢末，有七個縣城，番禺、博羅、中宿、龍川、四會、揭陽同埋增城。七縣總共有戶七萬一千四百七十七，口二十五萬二百八十二，比開郡時多幾倍^[4]。

隋

隋開皇十年，即係590年，將番禺縣拆多個南海縣^[2]。

大唐

大唐時嘅南海歸嶺南道，治所亦設埋喺度。當時南海係縣又係郡。

當時郡叫南海郡，等同一個州，所以又叫廣州，係個中都督府。大唐唔同年間會州郡換來用。唐末南海郡有縣十三，叫南海、番禺、增城、四會、化蒙、懷集、洊水、清遠、浛洭、湞陽、新會同義寧。當時戶4萬2235，口22萬1500。

南海縣係南海郡之下^[5]。

南漢

唐末節度使割據，南海由劉龔管。劉龔喺917年，南漢乾亨元年，自立為王，立都廣州，號南漢^[2]。佢將廣州改名興王府，將南海縣一分為二，南叫咸寧縣，北叫常康縣^[2]。

大宋

大宋時嘅南海歸廣南東路。當時南海又係縣又係郡^[6]。

當時郡叫南海郡，等同一個州，所以又叫廣州。不過都主要叫廣州，係中都督府，有清海軍節度。靖難之變前，有縣八，即係南海、番禺、增城、清遠、懷集、東筦、新會同信安。之後宋室南渡，無咗信安，但加咗香山^[6]。

而縣方便，大宋開國君主趙匡胤，開寶五年滅南漢，將常康縣同咸寧縣合併返做南海縣^[2]。

大清

大清時有九江浦主簿。另有三江、金利、神安、黃鼎、江浦、五鬥口六個巡司。南海西便有粵漢鐵路經，西南便有三佛鐵路 ^[1]。

經濟

南海歷來都係響廣東中心，而地又肥，比較富庶。所以佢同隔離番禺、順德，並稱三邑，又叫南番順。

注

1. ↑ ^{1.0 1.1 1.2 1.3} 清史稿。志、地理、廣東
2. ↑ ^{2.0 2.1 2.2 2.3 2.4} "石灣沿革". 原著喺2012年3月25號歸檔. 喺2008年8月23號搵到.
3. ↑ 漢書。志。地理
4. ↑ 後漢書。志。郡國
5. ↑ 《新唐書》。志、地理。嶺南道
6. ↑ ^{6.0 6.1} 《宋史》。志、地理。廣東南路